Remataron unhas exitosas xornadas do Polo da raza Mos no Asador O Cabuxo, en Muimenta, no concello de Cospeito, provincia de Lugo. Este restaurante para celebrar o seu décimo aniversario organizou estas xornadas de tres días, en colaboración coa granxa Chousa do Lea. Foron un gran éxito, consumíndose nos tres días máis de 120 kg. de carne de polo de raza Galiña de Mos, ademáis de empanada de polo. As aves foron cociñadas asadas en forno de leña, sorprendendo o seu espectacular sabor.
O 11 de novembro celebrouse a Feira de San Martiño, en
Francos, no concello de Teo. Os criadores Marco Antonio Feijóo e María Luisa
Canicoba, do mesmo concello de Teo, participaron na feira ofrecendo moita
información da raza, con venda de exemplares e ovos.
A Feira Etiqueta Negra, celebrada entre o 28 e o 30 de outubro, contou coa presenza de Sandra López, da granza Aeiroá e de María José Castro, da granxa Castro de Madrosende. Alí fixeron varias presentacións co chef Oliver Fernández Batista cun showcooking e ademais, no seu posto deron degustacións de hamburguesas de galo Mos e de empanada de galo con fariña de millo. Noraboa pola iniciativa. (A foto superior do chef Oliver Fernández pertence ao facebook de Etiqueta Negra Gourmet)
O domingo 29 celebrouse a ExpoDegustación da Galiña de Mos. Foi outro éxito repartíndose 800 racións de galo guisado, ovo frito con patacas, tarta de améndoa e queixo.
No CPI Plurilingüe Cernadas de Castro ubicado en Silva, no concello de Lousame, naceron poliños de Galiña de Mos que foron metidos na incubadora tres semanas antes. O nacemento dos polos foi un motivo de satisfacción para os nenos, que aprenden desta maneira o ciclo de incubación e nacemento dos polos.
