A Galiña de Mos en Láncara.

O 29 de agosto estivemos na Pobra de San Xiao, en Láncara, nas xornadas da Deputación de Lugo Saborea a túa provincia, onde o cociñeiro Santi Almuíña do restaurante Mesón Colón de Lugo, preparou para a degustación gratuíta "Galo de Mos en tres coccións con espuma de queixo de San Simón". O Director Técnico de Avimós, Diego Rois, ofreceu unha charla divulgativa sobre a nosa raza. Unha xornada máis para dar a coñecer a calidade dos nosos produtos.




A nosa raza no Corgo.

 O 29 de agosto a Galiña de Mos estivo na Feira do Ano do Corgo, da man de Sandra López, que asistíu ofrecendo información e presentando exemplares de Galiña de Mos.



A Galiña de Mos en Guitiriz.

O 21 de agosto estivemosen Guitiriz, participando nas xornadas Saborea a túa provincia, da man da Deputación de Lugo e promocionando a raza e os seus productos. Participaron o presidente Francisco J. Monasterio Solveira e o director técnico Diego Rois.


A Galiña de Mos en Láncara.

 O día 8 de agosto celebrouse en Láncara a Festa da Malla. Alí estivo a criadora Sandra López, de granxa Aeiroá.



Un ano máis o Galo na Vuelta Ciclista a España.

Un ano máis os produtos da nosa raza estarán presentes nas etapas da "Vuelta ciclista a España 2021".Asistimos á pesentación do acto organizado pola Asociación de empresarios de hostalería da provincia de Lugo (Apehl) e a marca E para comer Lugo, onde no posto da asociación, haberá desgustacións de varios dos produtos de calidade galegos, nas saídas das etapas por toda España. Alí estará o noso galo da raza Galiña de Mos.



No colexio Dolores Ramos de Santiago de Compostela naceron poliños.

 Uns días antes do remate do curso escolar, no Colexio Dolores Ramos-Peleteiro, naceron poliños da nosa raza, trala incubación feita 21 días antes. Durante eses días os alumnos aprenderon o ciclo de incubación dos ovos, como se aprecia a fertilidade co ovoscopio e todas as demáis características tanto das aves adultas coma no nacemento. O día de nacemento fumos polas diversas aulas do centro impartindo unhas charlas, mostrando un galo e unha galiña, que encantaron aos máis pequenos e a incubadora cos nacementos conseguidos. Outra experiencia moi gratificante.







Alumnos deseñaron unha incubadora.

Un grupo de alumnos da FP Básica do CIFP Ferrolterra de electricidade e electrónica, deseñaron unha incubadora para o nacemento de poliños da raza Galiña de Mos. Foron finalistas no Maker Faire Galicia 2021, unha feira de innovación das máis importantes de europa. 
Colaboramos neste proxecto con diverso material promocional entre os alumnos e na seguinte ligazón poderedes ver como foi todo o proceso, desde a fabricación da máquina ata vídeos do nacemento.

Esta iniciativa tivo un impulsor destacado o profesor do CIFP Ferrolterra Miguel Martínez Modroño, criador da nosa raza.



Boa acollida das Xornadas Gastronómicas no Forno de Tovar.

 Debido ao éxito que tiveron as Xornadas Gastronómicas que realizou o restaurante Forno de Tovar, en Lourenzá (Lugo), ampliáronse durante dez días máis, ata mediados de xuño. As aves procedían da granxa Chousa do Lea.



Congreso gastronómico cultural

O pasado 29 de maio asistimos en Lugo ao II Congreso Gastronómico Cultural, no que o cociñeiro Javi Estévez, con estrela michelín no seu restaurante La Tasquería, de Madrid, cociñou "patas de Galiña de Mos crocantes con espuma de queso San Simón". Unha maneira máis de aproveitar todas as partes posibles dos nosos animais. 


No PAI Valdoviño naceron poliños de Galiña de Mos.

No Punto de Atención Infantil do Concello de Valdoviño, naceron poliños da nosa raza. O día de nacemento os cativos estaban impacientes e desfrutaron moito coa experiencia. Posteriormente eles mesmos serán os encargadas de coidar dos poliños e vixiar o seu crecemento. 

A experiencia tivo repercusión na prensa, coma o artigo recollido en La Voz de Galicia



Novas Xornadas Gastronómicas

No Forno de Tovar, en Lourenzá, Lugo, desde o 13 de maio ata o 30 de maio, Xornadas Gastronómicas da raza Galiña de Mos. Organizadas pola granxa Chousa do Lea e o restaurante, chega un momento ideal para comezar de novo a desfrutar na hostalería das bondades dos produtos da nosa raza. 




Reportaxe sobre a nosa raza.

 O xornal Terra Chá Xá, fixo unha reportaxe sobre a nosa raza e criadores da comarca chairega.

Pódese ver
aquí

Un curso de formación visitou unha granxa de Galiña de Mos.

As Xornadas abertas organizadas polo Sindicato Labrego Galego na Terra Chá, contou coa visita a unha granxa de Galiña de Mos, a de Francisco Monasterio, en Vilalba. Alí durante 90 minutos establecimos cos  visitantes, unha conversa sobre a nosa raza e métodos de manexo na avicultura artesanal. Tivo repercusión a experiencia no xornal  El Progreso




Arrancan de novo as incubacións nos colexios.

 O Punto de Atención infantil do concello de Valdoviño, foi o lugar onde un ano despois, retomamos o noso programa de incubacións nos colexios, para achegarlle aos máis pequenos as características da nosa raza e a través dunha incubadora, observar o nacemento dos poliños. O día 19 de abril puxemos en marcha a incubadora. Que teñamos sorte!!




A Feira Semana Verde de Galicia trasládase a setembro.

A feria Abanca Semana Verde manténse en 2021, trasladando as súas datas para celebrar unha edición especial do 3 ao 5 de setembro. Desde a organización nos trasladan o seu interés en celebrar neste ano unha feira, en formato máis reducido e sempre, que as condicións sanitarias o permitan.
Manterémosvos informados.
Máis información aquí.

Asistimos a un encontro coa Deputación de Lugo.

A área de Medio Rural, do Mar e Mocidade da Deputación de Lugo reuniu o 9 de abril, ás asociacións agrogandeiras máis importantes da provincia, ASOPORCEL – Asociación de criadores de raza porco celta; BOAGA – Federación de Razas Autóctonas de Galicia (onde se atopa integrada AVIMÓS), OVICA – Asociación de criadores de ovino e caprino de Galicia e PURAGA – Asociación de Criadores de Cabalo de Pura Raza Galega,nun acto organizado no Museo Vivo e Integrado do Campo e a Locomoción Agraria (Muvicla)no Concello de Láncara, no que se fixo balance das iniciativas emprendidas conxuntamente durante o último ano para paliar o impacto da crise sanitaria no sector.
Alí estivemos intercambiando experiencias enriquecedoras para o rural galego.


Vídeo da Deputación de Lugo sobre as nosas razas autóctonas.

Presentámosvos un vídeo elaborado pola Fundación TIC da Deputación de Lugo, sobre as nosas razas autóctonas e o traballo da Federación Razas Autóctonas de Galicia-BOAGA. Agrademos o apoio  Deputación de Lugo, que este ano debido a non poder realizarse a feira Expolugo, participou na promoción das razas autóctonas galegas e os seus produtos. A nosa raza é unha boa protagonista deste vídeo que vos vai a gustar.




Galo de Mos con mel.

 O Programa da Televisión de Galicia "Quen anda aí?" do 11 de marzo, contou coa presenza do cociñeiro André Arzúa, que cociñou unhas peitugas de Galo da nosa raza con Mel de Galicia. O galo foi proporcionado por granxa Pitagudín, de Vila de Cruces. Pódese ver a partir do minuto 33.20 no seguinte enlace: https://www.crtvg.es/tvg/a-carta/programa-246-4865038?t=2800

20 aniversario de Avimós.

 O 12 de febreiro de 2001 fundouse a Asociación de Avicultores da Raza Galiña de Mos-AVIMOS.

Parabéns a todos os que nalgún momento formamos parte desta gran familia.

Na seguinte enlace, pódese ver unha reportaxe do xornal El Progreso de Lugo, sobre a nosa asociación. Pulsar aquí

Gravación dun vídeo da Deputación de Lugo.

 O 14 de xaneiro asistimos á gravación dun vídeo da Fundación Tic, dependente da Deputación de Lugo, sobre as nosas razas autóctonas. A raza protagonista foi a Galiña de Mos, na granxa do criador José Zapata, de Chousa do Lea. Participaron tamén o Presidente de Avimós e Directivo da Federación de Razas Autóctonas de Galicia - BOAGA, Francisco Monasterio e tamén, o Director Técnico da nosa asociación, Diego Rois.





Suscribirse a: Entradas (Atom)